1分鐘失波!利物浦靠沙拿12碼反勝熱刺
Jordan Henderson Mohamed Salah Liverpool 2019-20
Getty Images
今輪英超大戰,利物浦主場迎戰熱刺。這場上屆歐聯決賽翻版戰,輪到熱刺一開波就打開紀錄,哈利卡尼門前執雞領先;利物浦之後沉著應戰,換邊後先靠隊長佐敦軒達臣追平,之後沙迪奧文尼博得12碼,穆罕默德沙拿抽入,紅軍驚險反勝2:1完場。
高普:熱刺點會唔記得點踢波?

上屆歐聯決賽,利物浦一開波就博得12碼由沙拿抽入領先,今次風水輪流轉。孫興民於左路勁射省中紅軍守衛中楣彈出,哈利卡尼反應勁快衝前頭槌補中,熱刺火速領先。利物浦之後展開狂攻,但沙拿、羅拔圖法明奴先後起腳,都過不了熱刺門加沙寧加十指關,其中阿歷山大阿諾特禁區外第一時間遠射非常精彩,但又被加沙寧加飛身擋出,半場紅軍落後0:1。


利物浦換邊後7分鐘追平,法賓奴泰華利斯左腳妙傳入禁區,軒達臣於右路窄位,第一時間起左腳抽射,個波撻住入網,追成1:1平手。利物浦得勢不饒人,75分鐘文尼殺入禁區遭奧利亞侵犯,球證直指12碼點,沙拿繼歐聯決賽之後,再一次射死熱刺,帶領主隊反先,不過該名埃及前鋒卻於85分鐘傷出。熱刺孫興民完場前勁射遭艾利臣比加接實,最終利物浦反勝,聯賽10戰9勝1和,續以6分壓倒曼城排榜首。(goal.com)

意見 ()